Бруно Травен (В. Traven; 3 май 1890, Чикаго — 26 март 1969, Мехико) — немис ёзувчиси. Ҳақиқий исми Травен Торсван Кровс бўлган ва Рет Мерут, Рихард Маурхут, Хьотамаре фон Кирена, Артур Терлен, И.Мермет каби қатор тахаллуслар остида яшаб ижод қилган Бруно Травен 1890 йилнинг 3 майида Чикагода муҳожир оилада туғилди.
Ёшлигида у савдо флотида ишлади, кемада кичик матрос бўлди ва яна шу ерда официантлик қилди, сўнг кўмир ташувчи ва гўлахи юмушини ҳам бажарди.
Биринчи жаҳон уруши йилларида у Германияга келди ва бу ерда Рет Мерут тахаллуси билан публицист сифатида танилди. 1920 йилда Т.Т.Кровс Мексикага келади ва бу ерда пахта йиғувчи, олтин қидирувчи, ҳатто подачи бўлиб ҳам ишлайди. 1925 йилда Мексика деҳқонлари ҳақида “Пахта терувчилар”, кейинроқ денгизчилар тўғрисида “Мурдалар кемаси” ва олтин қидирувчилар ҳақида “Сьерра-Мадре хазинаси” романларини нашр эттирди.
Адиб ўз таржимаи ҳоли тўғрисидаги маълумотларни ошкор этишни истамасди. Унинг олтин қидирувчилар ҳақидаги романи асосида ишланган фильм муваффақият қозонгандан сўнг журналистлар ёзувчи билан боғланиб, унинг сирли ҳаётини ойдинлаштирмоқчи ҳам бўлганлар.
Ёзувчи Мексикада яшади ва 1957 йил Роза Лухан исмли аёлга уйланди. Кровс вафотидан сўнг унинг беваси 1969 йил матбуотга адибнинг туғилган йили, унинг ҳақиқий исми ва ҳаёти ҳақида батафсил баёнот берди.
Етмиш саккиз ёшга бориб ҳаётни тарк этган Травен Торсван Кровснинг хоки самолётда Мексиканинг Чьапас штатидаги тропик ўрмонларга сочиб юборилди.