Viktor Tomilov. Kosa tagida nimkosa

Kim bitta toshga ikki marta qoqilsa, uchinchi marta ham qoqiladi.

* * *

Batartib turmush uchun kurashib, o‘z uyida shikoyat daftari yuritishni yo‘lga qo‘ydi.

* * *

Agar dunyoni ag‘dar-to‘ntar qilmoqchi bo‘lsang, buning yo‘li oson: oyog‘ingni osmonga qilib, boshing bilan tursang bas.

* * *

O‘rmondagi e’lon: tsirkda ishlash uchun olim ayiq kerak.

* * *

Ko‘k rang tinchlantiradi: masalan, ko‘z ostidagi ko‘kariq…

* * *

Tushlar nafaqat umrni, balki ish vaqtini ham qisqartiradi.

* * *

Erning tortish kuchi hamma joyda bir tekisda emas: mansab orom kursilarida u sezilarli darajada kuchliroq.

* * *

Agar o‘zingizda kitobni ochishga yetgulik kuch topolmayotgan bo‘lsangiz, bemalol og‘ir atletika bilan shug‘ullansangiz bo‘ladi.

* * *

Bo‘ydoqlikning barcha huzur-halovatini his qilish uchun… uylanish kerak.

* * *

San’at qurbonlar talab qiladi, ammo qurbonlar hammavaqt ham spektaklga kelavermaydi.

* * *

Farishtadek yashash uchun shaytondek ishlash kerak.

* * *

O‘qishni boshlash hech qachon kech emas, hatto oliy o‘quv yurtini bitirgandan keyin ham.

* * *

E’lon: hammualliflar guruhiga muallif kerak

* * *

Ichishni tashlash o‘zi ozlik qiladi, sog‘lom fikrlashni ham o‘rganish lozim.

* * *

Kitob javoniga “dafn qilingan” kitobni dunyo yuzini ko‘rdi deb hisoblash mumkinmi?

* * *

Xotini uni katta odam deb hisoblaydi, chunki xotini olib bergan kiyimlari hamisha kattaroq keladi.

* * *

Pulni narigi dunyoga olib ketib bo‘lmaydi, ammo pul bilan orttirilgan shuhratni olib ketish mumkin.

* * *

Stolning fikri: oyoqlar va keng yelka bo‘lsa bo‘ldi, bosh hammavaqt topiladi.

* * *

— Eh! Mening hayotimga hech kim aralashmagandami! Nimalarga qodir ekanligimni ko‘rsatib qo‘yardim! — dedi xamir.

* * *

Yaxshi eshitish qobiliyati nafaqat musiqachilarga, balki jamoatchilikning fikrini bilishi lozim bo‘lgan odamlarga ham kerak.

* * *

Shuhratparast edi… jismoniy mashqlardan faqat yuqoriga tortilishnigina bajarardi…

* * *

Nog‘oraning asosiy afzalligi — ichi bo‘shligidir.

* * *

Ishlayotganlarga kamroq xalal berish — ishlab chiqarishni o‘stirishning katta zaxirasidir.

* * *

Bir ko‘z qisish bilan bitadigan ishlar bor, ammo kimga ko‘z qisishni bilish kerak-da…

* * *

Qo‘llar va oyoqlar tezroq boyib ketishni istab qolishganda, boshni qimmatroq bahoda sotishga harakat qilishadi.

* * *

Oltindan yasalgan baliq Oltin baliq bo‘lolmaydi.

* * *

O‘zing o‘tirgan shoxni kesishning nima keragi bor? Pishaver — o‘zlari qoqib tushirishadi.

* * *

Butun hayotida qiyshiq oynaga qarab kelgan odam to‘g‘ri oynadan o‘zini taniy oladimi?

* * *

Odam hamma narsaga qodir! Faqat odam bo‘lish qiyin.

* * *

Miqdor sifatga aylanadi, ammo yuqoridan berilgan ko‘rsatma bo‘yicha…

* * *

Qanday boy til!… U bilan har qanday miqdordagi pulni ifodalash mumkin.

* * *

Agar qo‘llar qisqa bo‘lsa, unda muvaffaqiyat oyoqlarning uzunligiga bog‘liq bo‘ladi.

* * *

Keng xalq iste’moli mollari fabrikasi parodiya janrida faoliyat ko‘rsatardi…

* * *

Uchar likopchani cho‘chitib yubormaslik uchun unga qoshiq ko‘tarib yugurib bormaslik kerak…

* * *

Qora kunga deb o‘g‘irlangan narsa o‘sha kunni yaqinlashtiradi.

* * *

Moddaning og‘irligi o‘lchanayogan joyga emas, kim o‘lchayotganiga bog‘liq.

* * *

Ayrim odamlar qayerga yiqilishi mumkinligini bilishadi va oromkursi hozirlab qo‘yadi.

* * *

Eshakning faxrlanish uchun asosi bor — uni tez-tez odam bilan tenglashtirib turishadi.

* * *

Ko‘z, qosh, burun ham milliy o‘ziga xosliklarga… og‘iz esa baynalmilal xarakterga ega.

* * *

Bo‘ri ham qo‘ylarni yaxshi ko‘radi, ammo o‘ziga xos tarzda…

* * *

Yozganlari shunchalar xom ediki, g‘ijimlab o‘choqqa solganda ham yonmadi.

* * *

Odamlarni bir-biridan masofa emas, fikrlar uzoqlashtiradi.

Ruschadan Habib Siddiq tarjimasi.

“Jahon adabiyoti” jurnali, 2005 yil, 12-son