«Iste’dod» turkumi (1994-1998)

Havasxon Shokirova. Ko‘zimdagi maktublar: She’rlar. T.: «Yozuvchi», 1994.

Aziz she’rxon!
Siz tongda iymayibgina ochilayotgan atirgul chiroyiga yoki erta ko‘klamda ohista qad rostlayotgan maysaning holatiga razm solganmisiz? Ushbu mo‘jaz to‘plam bilan tanishsangiz, Sizda shunga o‘xshash taassurot qolsa ajab emas. Negaki, bu she’riy guldasta iste’dodli yosh shoira Havasxop Shokirovaning o‘quvchilarga ilk tuhfasi. Iymanibgina tortiq etilgan bunday tuhfa Sizga manzur bo‘ladi, degan umiddamiz.

Farhod Arziyev. Yolg‘izlik ranglari: She’rlar. T.: «Yozuvchi», 1996.

Ko‘ngilga So‘z izlayotgan, sahrodan dengiz, Ishq tovushini, hamda shu tovushning rangini izlayotgan erkin va sarkash Ruhning qiyofasini ko‘rganmisiz… Azoblarning achchiq ta’mini tuyganmisiz… «Dengiz hidi anqigan» qo‘shiqlarga qo‘shilib oqqanmisiz…
«Yolg‘izlik rangi»ni o‘qisangiz siz Botinning yana ko‘p sirli azoblarini tuyasiz. Ko‘ngil yaralari ochilib ketadi…

Faxriyor. Dardning shakli: She’rlar. T.: «Yozuvchi», 1997.

Faxriyorning «Dardning shakli» to‘plamiga kirgan she’rlar mavzu jihatdan rang-barangdir. Ularni birlashtirib turadigan narsa shoirning voqelikka bezovta va kuyunchak munosabatidir. U dardlariga tinimsiz shakl izlaydi. Tashbihlar vositasida bir-biridan uzab ketgan voqeliklarni va mohiyatlarni o‘zaro yaqinlashtiradi, chog‘ishtiradi. Bu hol ularni uyg‘un holda tasavvur etish imkonini beradi. Uning nazarida, tashbih — mazmun qofiyasi. Qofiyali verlibrlarni, fikrni asl shaklida saqlab qolish ehtiyojidan tug‘ilgan, deyish mumkin.
To‘plamga kirgan she’rlarning aksariyati oldingi yillarda yozilgan.

Vafo Fayzullo. Xabarsiz sevinch: She’rlar. T.: «Yozuvchi», 1997.

Bolalikning mo‘jizali yurtida nimanidir unutganmiz. O‘sha unutgan narsamiz o‘zligimizni bir qismi edi. Endi bolalikning sirli chog‘larini sog‘inib yashaymiz. Shu sog‘inchsiz ko‘nglimiz yarim. Shoir Vafo Fayzulloning she’rlarida ham o‘sha ma’sum onlarga sog‘inch, yo‘qlov yetakchilik qiladi. Ushbu she’rlarni o‘qib, yo‘qotgan narsangizni topganday bo‘lasiz. Ko‘nglingizga aziz tuyg‘ular bir muddat bo‘lsa-da. yana hamroh bo‘ladi, hurmatli o‘quvchi!

Go‘zal Begim. Sukunat jaranglari: She’rlar. T.: «Yozuvchi», 1998.

Go‘zal Begim she’riyat ixlosmandlari qalbiga yangi so‘z, yangicha tafakkur olib kirayotgan shoirlar qatoriga kiradi. Ushbu she’rlarni o‘qib Siz hayajonlanasiz, undagi obrazlar balki o‘zingizda borligini payqamagan kechinmalaringizni yuzaga chiqaradi, shoira she’rlaridan ko‘nglingizga go‘zal sharpalar qo‘chib o‘tadi.
Go‘zal Begimning ilk to‘plamini Sizga takdim etar ekanmiz, Sizning she’rga chanqoq ko‘nglingiz ushbu she’rlarni munosib baholaydi, deb umid qilamiz.

Guljamol Asqarova. Dil fasli: She’rlar. T.: «Cho‘lpon», 1998.

Guljamolning she’rlari hislar tarangligidan tug‘ilgan. Ularni befarq o‘qiy olmaysiz. Shoiraning hayajoni, zavqi sizga ham yuqadi. Ana shu yaqinlik, hamrozlik umri boqiy bulishiga tilakdoshmiz.

Jahondor Bo‘riyev. Taajjub: She’rlar. T.: «Cho‘lpon», 1998.

Jahondor Bo‘riyev 1981 yili Toshkentda tavallud topgan. Respublika Navoiy nomidagi nafis san’at litseyini tugatish arafasida.
Jahondor she’r mashq qilish bilan birga ingliz, arab tillarini puxta o‘rganishga ahd qilgan, rus tilini mukammal biladi.