(1896 йил, Хўжанд – 1938 йил, 7 май)

Давлат ва жамоат арбоби бўлган Абдулла Раҳимбоев Хўжанд шаҳрининг Раззоқи маҳалласида савдогар оиласида дунёга келган. 1910-1912 йилларда у Самарқанддаги эркаклар гимназиясида, сўнгра Тошкентдаги ўқитувчилар семинариясида билим олди (1917). У 14 та тилни билган.

А. Раҳимбоев 1919 йилдан бошлаб совет идораларида хизмат қила бошлади. Туркистон АССР МИКнинг раиси (1920-1922), Туркистон АССР Маориф халқ комиссари лавозимларида ишлади. унинг онгига “коммунистик ғоя”ни сингдириш учун 1922 йилда у Москвага чақирилади. Марказий ҳукумат қошидаги “тайёрлов”дан сўнг А. Раҳимбоев Бухоро Компартияси ва Туркистон КПнинг Марказий Қўмитаси котиби лавозимларида ишлади (1923-24). Ўрта Осиёда миллий-ҳудудий чегараланиш ўтказишда фаол қатнашди ва бу тадбирни қўллаб-қувватлади.

А. Раҳимбоев 1925 йилдан Москвада яшай бошлади. СССР халқлари Марказий нашриёти бошқармаси раиси лавозимида ишлади (1928). Сўнгра у Душанбега юборилди. Тожикистон ССР ХККнинг раиси (1934-1937) сифатида ҳам фаолият кўрсатди.

А. Раҳимбоев 1937 йилда қамоққа олинди ва 1938 йил 7-майда отиб ташланди.