Хосе Горостиса (José Gorostiza Alcalá) – мексикалик шоир, ўқитувчи ва дипломат. Мексика Миллий университетини тамомлаган ва кейинчалик шу ўқув даргоҳида адабиётдан дарс берган. 1930 йилларда Англия, Дания ва Италия каби мамлакатларда элчи вазифасида ишлаган. 1940 йилларда БМТнинг Мексика бўйича вакили бўлиб хизмат қилган. Унинг лирик қўшиқлар тўплами ва “Сўнгсиз ўлим” поэмаси Лотин Америкаси сўз санъатининг ноёб ёдгорлиги ҳисобланади.

СОВҒА

Ширадор ва ярқироқ қизил,
апельсинни олиб келар ким?
Юрагимга бермоқ-чун таскин
апельсинни совға қилар ким?
Денгиз суви ярамни ёқар,
юрагимга оғриқлар солар.
Денгиз тузи томирларимда,
Лабларимда денгизнинг тузи.
Ким лабидан беради бўса?
Ўпичнинг оппоқ бошоғин
юлиб бера олмайман сенга.
Ким ичади менинг қонимни
то ақлидан буткул озгунча.
Бехабарман, тўнғидими қон,
ёки оқаяптими ҳамон
Гар юрагим йўқолиб қолса –
Худо урди, тамом.
Осмондаги булут мисоли
Демак, юрак йўқолиб қолди.
Уммон ичра адашган бехос,
Кема каби юрак титрар, рост.
Юрагимга бермоқ-чун таскин
Апельсинни совға қилар ким?

Рус тилидан Абдумажид Азим таржимаси