Отомо-но Якамоти (大伴家持) — япон шоири. Отомо-но Табитонинг ўғли. Яаон шеъриятининг йиғувчиларидан бири. «Манъёсю» антологиясининг тузувчиларидан. Антологияга унинг 46 нагаут ва 480 танкаси киритилган.

* * *

Оқшом чўкар экан,
Дарвозани очиб қўйганча,
Тушларимда шивирлаб шодмон
“Ҳузурингга бораман” деган
Маҳбубамни кутаман интиқ…

* * *

Ҳаттоки ёлғондаям
Мисқолчалик ҳақиқат бор-ку!
Сен ҳам, балки, эй суюкли ёр,
“Сени севмайман” деганинг билан
Озгина бўлса ҳам яхши кўрарсан?

* * *

Фалаклардан тўкилган
Шаффоф қордай беғубор,
Дарвозамнинг олдида
Қишки олхўри шохи
Оппоқ бўлиб гуллабди!

* * *

Бугун эрта саҳарда кузнинг
Шамоллари совуқ келтирди.
Оҳ, яқиндир, жуда яқиндир,
Ёввойи ғоз – саргардон сайёҳ
Сўнг бор бўзлаб учиб кетади…

* * *

Зийрак қулоқ тутсанг, эшитажаксан —
Куз келганда, тонготар маҳал,
Илк шуълалар жимирлаган пайт,
Тоғлар аро қалдироқ солиб,
Ёлғизликда бўзлайди буғу.

* * *

Одам зоти бўлмаган бирор гўша бормикан ,
Биронта жон бўлмаган ўлка борми дунёда ?
Ўша ўлкага кетсам
Суюкли ёрим билан,
Барча чеккан азобим унутилиб кетарми?

Хуршид Даврон таржималари

* * *

Муҳаббатинг ­ изтироб,
Фироққа беролмам тоб.
Яшма бўлганим маъқул,
Уни тақиб мен билан
Қолар эди моҳитоб!

* * *

Мунча йироқсан, пойтахт!
Дилдор ҳам олис жуда…
Минг севаман десам-да,
Кўролмайман уни ҳеч
На тушим, на уйқуда!

* * *

Бўрон шабадасидан
Олча гули тўзгандай,
Дарак бердинг пайдар-пай…
Севгим қайта уйғонар,
Шодман, садағанг кетай!

* * *

Ўтди ғозлар галаси
Булутдан баланд ҳатто.
Сен ҳам олисда пари…
Васлинг излаб, овора
Бўлдим топгунимча то!

Рус тилидан Файзи Шоҳисмоил таржимаси.