Замонавий турк адабиётининг машҳур ёзувчиларидан бири, уста романнавис ва драматург Тариқ Буғро 1918 йилнинг 2 сентябрида Туркиянинг Кўниё вилоятига қарашли Оқшаҳар туманида туғилди. Тариқ Буғронинг илк асари “Аккумуляторли радио” номли пьесаси шаҳар театрларида катта маҳорат билан ижро этилади. Адиб кейинроқ бу пьесани кенгайтириб романга айлантиради ва “Ёлғизлар” номи билан чоп эттиради. Унга катта шуҳрат келтирган “Ўғлимиз” номли ҳикоясини 1948 йилда ёзди. Бу ҳикоя “Жумҳурият” газетасининг махсус мукофоти билан тақдирланди. Тариқ Буғро 1949 йилда бир неча ҳикоясини тўплаб “Ўғлимиз” номи билан китоб ҳолида нашр эттирди. Шундан кейин адибнинг “Эртага дея кўрма”, “Икки уйқу орасида”, “Қора қаҳрабо”, “Фиравннинг имони”, “Ёмғирни кутиб” ва бошқа китоблари нашрдан чиқди. Тариқ Буғро кўплаб саҳна асарлари билан турк драматургиясининг ривожига катта ҳисса қўшди. Унинг “Оёққа туришни хоҳлайман” ва “Уч ўйин” номли китобига жамланган барча пьесалари саҳналаштирилган. Бугунги кунда ҳам театрларда муваффақият билан ижро этилмоқда.Тариқ Буғро 1994 йилнинг 26 февралида Истанбулда вафот этди. Ҳозирда Туркиянинг турли вилоят ва шаҳарларида унинг номи билан аталадиган мактаб, лицей, кўча, ҳиёбонлар мавжуд. Адиб туғилиб ўсган Оқшаҳар ва Анқарадаги Миллий кутубхона боғига унинг ҳайкали ўрнатилган.
Хотиним ғира-шира кўрина бошлаган дераза токчаси олдида ўтирарди. Бутун кечани ўша жойда ўтказибди, бечора. “Сен, шу пайтгача ётмадингми?” -дедим. Қаддини ростлади. Кул ранг дераза токчаси ёнида бор-йўғи бир кўланкадан иборатдек кўринарди. Аммо бу кўланкада бирга ўтказган йигирма йилдан ортиқроқ умримизнинг давоми…