Исматулла Маманов

* * *

Еру осмон, сув, ҳавони берган Ўзинг,
Олам узра куй, навони берган Ўзинг,
Қудратинг-ла яралган бир ожиз бандангман,
Дард бергансан, давони ҳам берган Ўзинг.

* * *

Деманг, дунё ғурбатлардан иборат,
Фисқу фужур, ғийбатлардан иборат.
Ўзлигини англаб етган инсонга
Дунё дилкаш суҳбатлардан иборат.

* * *

Ёлғизлик фақат Яратганга ярашар,
Ҳаётда ҳамроҳинг, дўстинг билан юр.
Ҳамроҳнинг кимлиги кўп муҳим, билсанг —
Ўзингдан бир сифат устун билан юр…

* * *

Ризқимиз очилган ҳар жой оралаб,
Уни тераяпмиз гоҳ қўл яралаб.
Қайсимиз ҳалол ё ҳаром еганмиз,
Худоим Маҳшарда олар саралаб.

* * *

Таъмагирдан савоб ишлар кутмагин,
Ҳаёсизнинг кўчасидан ўтмагин.
Фанода шайтоннинг шотирлари кўп,
Бунда йўлиққаннинг дастин тутмагин.

* * *

Айбинг бўлса рангинг ўчиб яшайсан,
Қўрқув, таҳликани қучиб яшайсан.
Балои бадларга гирифтор бўлиб,
Таваҳҳумга тушиб, чўчиб яшайсан.

* * *

Хотин ёмон бўлса, меҳмонинг кетар,
Фарзанд ёмон бўлса, дармонинг кетар.
Ҳеч қуриса бирига инсоф сўрагин,
Иккиси ёмон бўлса, иймонинг кетар.

* * *

Тўрт томон ноҳақлик дегандан кўра,
Ўзинг тўғримисан, қалбингдан сўра.
Нафс ғолиб жойларда қачон ҳақ бўлган,
Иймонинг бут бўлса, ҳақ шу-да, жўра.

* * *

Важ қидириб юриш шартмас узоқдан,
Адолатнинг дасти кетди шилиниб.
Кечда нокас Шерга қўйган тузоққа
Тонгда содда Қуён қолди илиниб.