Собир Сайҳон Фарғона вилоятининг Тошлоқ туманидаги Варзак қишлоғида 1931 йили туғилган. Собир Сайҳоннинг отаси Холмуҳаммадхўжа Асомиддинхўжа мингбоши ўғли ўтган асрнинг 20-йилларида қўрбоши Шермуҳаммадбек раҳбарлигида миллий-озодлик ҳаракатида фаол иштирок этганлардан бири. 30-йилларнинг бошларида унинг ота-онаси ҳам Фарғонани ташлаб кетишга мажбур бўлишади. 1952-йили бошқа туркистонлик ватандошлар каби уларнинг оиласи ҳам Туркияга кўчиб ўтади. Собир Сайҳон Туркияда, олдин Адана шаҳрида, 1964-йилдан бошлаб эса Истанбулда истиқомат қилиб келмоқда.Ёшлигидан адабиётга ҳавас қўйган Собир Сайҳоннинг шеърлари, илк ҳикоялари, мақолалари 1953-йилдан эълон қилина бошлаган. Кейинчалик унинг ватан ишқи, фидойилик ва миллийлик руҳи билан суғорилган бир қатор асарлари Ўзбекистон ва Туркияда бир неча бор чоп этилди.Собир Сайҳоннинг Ўзбекистонда 1992-йили “Тижорат ва ҳалол ош” маърифий-тарбиявий рисоласи, 1996-йили “Адашганлар” адабий асари, “Тўлғаной” ва “Емирилган ғурур” ҳикоялар тўпламлари чоп этилган. Бундан ташқари, 2006-йили “Ватан қидирган йигит”, 2009-йили “Буғдой экиб, арпа ўрганлар”, 2010-йили эса “Эгасини ғажиган ит” қиссалари нашр этилди. У кишининг асарлари асосида “Ватан ягонадир”, “Бир сиқим тупроқ”, “Бировнинг қариндоши” каби телевизион филмлар яратилган. 1995-1996-йиллар Собир Сайҳон ссенарийси асосида мамлакатимизда “Силсила” номли тарихий, бадиий филм суратга олинди.Собир Сайҳон ҳурматли ўзбек адиби Одил Ёқубовнинг «Улуғбек хазинаси» асарини турк тилига ўгириб туркиялик китобхонларга тақдим этган.Собир ака “Сайҳон” тахаллуси билан шеърлар ҳам ёзади. Ушбу шеърлар Ўзбекистондаги «Ватан» жамияти томонидан тайёрланган шеърий тўпламларга киритилган.