Такараи Кикаку (宝井 其角, 1661—1707), Эномото Кикаку номи билан ҳам машҳур — Басё мактаби вакилларидан бўлган шоир.

* * *

Гадо сафарда!
Унинг учун усти бош
Ёзда кўк ва ер.

* * *

Саҳар тушимда
Онам келди… Ҳайдама,
Какку, қичқириб.

* * *

Жиддий таъна тингларкан,
Қиз қуйи солди бошин,
Тунги қизғалдоқ янглиғ.

Рауф Парфи таржимаси

* * *

Ойнинг порлоқ шуъласи!
Қарағайнинг сояси
Тушиб турар чилторга.

* * *

Йўлда йўловчи гадо!
Ёзда бор-йўқ либоси —
Узоқ осмон, қаттиқ ер!

* * *

Тонг чоғи онажоним
кириб келди тушимга…
Қувиб юборма уни
сайроғинг билан, какку!

* * *

Сенинг балиқларинг нақадар тотли!
Бироқ сен уларни, кекса балиқчи,
Тотиб кўра олсайдинг ўзинг.

* * *

Нақадар аччиқ фарёд!
Мушук қўлига тушган
Қушнинг онаси йиғлар.

* * *

Қаҳратон қиш.
Кенг саҳрода қўриқчи —
Қарғаларга қўналға.

* * *

Вақт қишга бож тўлади
Ва тинчиб қолди бирдан
Саратонда денгиздай.

* * *

Ивиб қолган қалдирғоч!
Ошёнингга киргандай
Шамсияга кириб ол.

* * *
Тўлин ой нури!
Қарағайнинг сояси
бўйрага тушди.

* * *

Пашшаларнинг енгил галаси
Баланд учар — юзгувчи кўприк
Менинг орзуларим учун.

* * *

Ой гардиши туман ичинда…
Икки соққа ялтирар буталар аро:
Кўзойнаги хира Бойқушнинг.

* * *

Тонг юлдузи!
Олчазорда тинчлик йўқ.
Тоғ бошида булутлар.

* * *

Басё хотирасига
Мана, ўн йил ўтиб кетди,
Кечагина вафот этгандай гўё…
Мажнунтоллар хомушдир!

Рус тилидан Турсун Али таржимаси

* * *

Гадо йўлда!
Бор-йўқ энгил-боши –
Осмону замин.

* * *

Тушларимга кирмоқда эди
Хўрозлару… қичқириқлари,
Нечун ҳайдаб юбордингиз, она?

Рус тилидан Абду Наби таржимаси