Мидзухара Сюоси (水原豊) – япон шоири. Ҳақиқий исми – Мидзухара Ютака. Токиода туғилган. Токио университетеини тамомлаган ва бир неча йил врач бўлиб ишлаган.
* * *
Токчадаги ёғоч қўғирчоқ –
Қотиб қолган кўзлари билан
Асрлар ортидан боқиб туради.
* * *
Минг йиллик қорлар узра
Юксалган оқ чўққида
Сакура гуллайди сукунат аро.
Хуршид Даврон таржимаси
***
Кўл узра порлаётган ойни ,
Томоша қилмас ҳеч ким
Барча шоли ўримида…
***
Бинафшалар гуллади яна
Топталди сўқмоқлар
Баҳорги ўрмонларда
***
Олмалар гуллаган.
Боягина ёққан баҳор селида ,
Оппоқ гул қоплади сохил сувларин.
***
Ой порлар.
Қайинлар сояси сезилмас ,
Туманларга чўмган қайинзор
***
Баҳорни кузатаяпман
Ёмғирларда шалоббо ивиб
Булутлар билан юзма – юз , тоғда
***
Ёмғирли кун.
Оқин бўйлаб оқар хризантемалар
Кўринмайди биронта қайиқ
***
Чой гуллайди баланд қояда ,
Шом зулмати қоплаган тоғлар.
Олислардан кўтарилар ой
***
Нахотки бинафша
Ёлғиз гуллади
Тутзорда яна…
***
Қалдирғочлар чийиллаб учар ,
Тоғлар орасидаги уйимнинг ,
Томи устидан.
***
Хаги гуллаётир
Асама тоғига чиқаман
Булутларни қайриб…
***
Жарлар аро , тўлқинлар узра ,
Чайкаларнинг ини ёнида
Олхўри гуллар…
***
Беркинади ўт – ўлан ичра
Тунаш учун ўтлоқ каккуси ,
Яқинлашар тун…
Холдор Вулқон таржималари
«Одарэмидзу довонида навбаҳор» туркумидан
* * *
Булбул куйлаётир
ёмғирнинг остида тикка қояда –
бўзлаб-бўзлаб чиқар фарёди…
* * *
Ипакқурт ғумбаги.
Қорли қоя юксакдан қарайди
дараларнинг тубига…
«Қиш қўшиқлари» туркумидан
* * *
Қандай гўзал Арслоннинг рақси!
Фудзи этагида шуълаларга ғарқ
Қўллар, қўллар…
«Хризантемалар ва турналар» туркумидан
* * *
Хризантема ифори!
Бир жуфт турна унсизгина
қўнадилар ўтлоққа.
* * *
Хризантемалар аро
турналар кезар жуфт-жуфт,
гуллар каби покиза, оппоқ…
* * *
Очиқ «хризантема куни».
Оқшом совий бошлади –
турналар товуши аччиқ.
«Накосо чегараси» туркумидан
* * *
Менинг умрим!
Хризантема билан якка
тек қотган сукутда…
* * *
Ошёнларини ташлаб,
Кулбаларнинг қошига
Қўнадилар қушчалар…
«Ямато кўчаси» туркумидан
* * *
Гуллаётган новдалар.
Кўклам, ўтлоқзор сокин –
унинг ўхшаши йўқдир!..
«Норинура тоғи ёнбағирларида» туркумидан
* * *
Тоғнинг чўққиларидан
туман тўлқини тушди,
мавжланди денгиз каби…
* * *
Юлдузлар милтирайди,
Қор босган водийга боқаман хушҳол,
Недандир қайғураман…
Русчадан Турсун Али таржималари