Виталий Коротич (1936)

Виталий Коротич (Віталій Олексійович Коротич) — украин шоири, адиб, муҳаррир, журналист, жамоат арбоби. АҚШ адабиёт ва санъат академияси аъзоси, профессор. Қайта қуриш йилларида «Огонёк» журналига муҳаррирлик қилган.

НОЗИМ ҲИКМАТГА ТАТАББУЪ

Мен дунёдан кетишдан аввал,
Қанча ишлар қилмоғим керак.
Шодлик бўлиб қолмоғи учун —
Кашф этмоғим лозим бир юлдуз.
Буғуни — ўлимдан сақлаган каби,
Асрагандек нокни — аёздан,
Олмани — офтобдан, ҳаётни эса —
Тақдир нағмасидан авайлагандек;
Қўриқлашим керак илҳомни

Мен дунёдан кетишдан аввал…
Кувачадан олганим сувнинг
Билсам оби-ҳаёт эканин,
Бесас, сукут комида ётган;
Лочинларни,
Аёлларни,
Болаларни
Ва орзуларни
Руҳлантирар эдим бегумон.

Мен дунёдан кетишдан аввал,
Қанча ишлар қилмоғим керак…
Бир даста гул ётибди ерда,
Қани унинг мармар гулдони?
Абадиймас ҳамон муҳаббат.
Менинг эса яшамоғим шарт.

Мен дунёдан кетишдан аввал,
Қабристону мозорни четлаб
Қанча ишлар қилмоғим даркор,
Мен дунёдан кетишдан аввал!..

Русчадан Аҳмад Тошхўжаев таржимаси.