Муҳаммад Афифий Матар (محمد عفيفي مطر; 1935 – 28 июнь 2010) – миср шоири. Айн Шамс университетининг фалсафа факультетини тамомлаган. 10 дан ортиқ китоблари чоп этилган.

* * *

Орзулар тойчоғи ўтлар ўтлоқда –
Севгилим кўйлагин ҳиди келмоқда.
Атрофда уюм кул. Кулўчоқ. Демак –
Тунги базмлардан келмоқда дарак.

Қумдаги изларга кўз тикаман боз,
Бу ерда тўй бўлган. Рақс тушганлар. Соз…
Тўй изи. Тулпорлар. Тахтиравонлар.
Машшоқлар. Мақомлар. Рақслар. Жононлар.

Балки, ким билади, хаёлдир бари –
Тўй ҳақдаги ошиқ тасаввурлари…
Магар шундай бўлса, ошиқ хаёли
Сал вақтда учади сароб мисоли.

* * *

Манов соҳил майсалари
Зич чирмашибдир,
Бир-бирига мутаносиб,
Хўб ўрнашибдир.

Сув тагига қараб-қараб
Тикилган сари,
Келинчакдай чиқиб келар
Сув парилари.

Соҳил узра қуёш сочар
Тилла танга – нур,
Улар сенга келинрўмол
Бўлиб кўринур.

Камалакранг рўмол
Жимир-жимир, қилади,
Сув тагидан паривашлар
Чиқиб келади.

Музаффар Аҳмад таржимаси