Тўлепберген Қаипбергенов 1929 йили Қорақалпоғистон Республикасининг Кегейли туманида туғилди. Меҳнат фаолиятини 1947 йили мактаб ўқитувчиси сифатида бошлади. Қорақалпоқ давлат педагогика институтини тамомлаганидан сўнг кўп йиллик ижодий ва ташкилотчилик фаолиятини қорақалпоқ миллий матбуоти ривожига бағишлаб, “Қарақалпақстан жаслары” газетаси муҳаррири, “Қарақалпақстан” нашриёти директори, “Совет Қарақалпақстаны” газетаси муҳаррири, Қорақалпоғистон Республикаси Вазирлар Кенгаши ҳузуридаги Радиоэшиттиришлар ва телевидение қўмитаси раиси, Матбуот, полиграфия ва китоб савдоси бўйича давлат қўмитаси раисининг ўринбосари каби масъул вазифаларда сидқидилдан меҳнат қилди. У 1980 йилдан бошлаб Қорақалпоғистон Республикаси Ёзувчилар уюшмасининг раиси лавозимида самарали фаолият олиб бориб, қорақалпоқ адабиёти ва санъатини ривожлантириш, ёш шоир ва адибларни тарбиялаш ишига катта ҳисса қўшди. Т.Қаипбергенов жамоат ишларида ҳам фаол иштирок этиб, бир неча бор Қорақалпоғистон Жўқорғи Кенгеси ва Нукус шаҳар кенгаши депутатлигига сайланди.Тўлепберген Қаипбергенов ўзининг ярим асрдан зиёд давом этган ёзувчилик фаолияти давомида катта ва сермазмун ижод йўлини босиб ўтди. Ўз асарларида қорақалпоқ халқининг тарихи, бугунги ҳаёти, миллий қадрият ва анъаналарини юксак маҳорат билан тараннум этди. Унинг қаламига мансуб “Раҳмат, муаллим”, “Совуқ бир томчи”, “Котиб”, “Қорақалпоқ қизи”, “Маманбий афсонаси”, “Бахтсизлар”, “Гумроҳлар” сингари қисса ва романлар,“Қорақалпоқ достони” трилогияси адабиётимиз хазинасидан муносиб ўрин эгаллади. Бу асарларнинг аксарияти жаҳондаги кўплаб тилларга таржима қилиниб, бир қатор нуфузли адабий мукофотларга сазовор бўлган эди.Жонкуяр адибнинг кейинги йилларда эълон қилинган публицистик чиқишларида мустақиллигимизнинг маънавий асосларини мустаҳкамлаш, қорақалпоқ заминида амалга оширилаётган улкан ўзгариш ва янгиланишлар жараёнини акс эттириш, бағрикенг халқимизнинг бунёдкорлик меҳнатини улуғлаш, Орол муаммосига жамоатчилик эътиборини қаратиш мавзулари алоҳида ўрин эгаллади.Атоқли ёзувчининг адабиётимизни ривожлантиришдаги хизматлари давлатимиз томонидан муносиб тақдирланди. У “Қорақалпоғистон халқ ёзувчиси”, “Ўзбекистон халқ ёзувчиси” фахрий унвонлари, “Шуҳрат” медали, “Дўстлик” ва “Эл-юрт ҳурмати” орденлари ҳамда Ватанимизнинг олий мукофоти — “Ўзбекистон Қаҳрамони” унвони билан тақдирланган.