Виктор Томилов. Коса тагида нимкоса

Ким битта тошга икки марта қоқилса, учинчи марта ҳам қоқилади.

* * *

Батартиб турмуш учун курашиб, ўз уйида шикоят дафтари юритишни йўлга қўйди.

* * *

Агар дунёни ағдар-тўнтар қилмоқчи бўлсанг, бунинг йўли осон: оёғингни осмонга қилиб, бошинг билан турсанг бас.

* * *

Ўрмондаги эълон: циркда ишлаш учун олим айиқ керак.

* * *

Кўк ранг тинчлантиради: масалан, кўз остидаги кўкариқ…

* * *

Тушлар нафақат умрни, балки иш вақтини ҳам қисқартиради.

* * *

Ернинг тортиш кучи ҳамма жойда бир текисда эмас: мансаб ором курсиларида у сезиларли даражада кучлироқ.

* * *

Агар ўзингизда китобни очишга етгулик куч тополмаётган бўлсангиз, бемалол оғир атлетика билан шуғуллансангиз бўлади.

* * *

Бўйдоқликнинг барча ҳузур-ҳаловатини ҳис қилиш учун… уйланиш керак.

* * *

Санъат қурбонлар талаб қилади, аммо қурбонлар ҳаммавақт ҳам спектаклга келавермайди.

* * *

Фариштадек яшаш учун шайтондек ишлаш керак.

* * *

Ўқишни бошлаш ҳеч қачон кеч эмас, ҳатто олий ўқув юртини битиргандан кейин ҳам.

* * *

Эълон: ҳаммуаллифлар гуруҳига муаллиф керак

* * *

Ичишни ташлаш ўзи озлик қилади, соғлом фикрлашни ҳам ўрганиш лозим.

* * *

Китоб жавонига “дафн қилинган” китобни дунё юзини кўрди деб ҳисоблаш мумкинми?

* * *

Хотини уни катта одам деб ҳисоблайди, чунки хотини олиб берган кийимлари ҳамиша каттароқ келади.

* * *

Пулни нариги дунёга олиб кетиб бўлмайди, аммо пул билан орттирилган шуҳратни олиб кетиш мумкин.

* * *

Столнинг фикри: оёқлар ва кенг елка бўлса бўлди, бош ҳаммавақт топилади.

* * *

— Эҳ! Менинг ҳаётимга ҳеч ким аралашмагандами! Нималарга қодир эканлигимни кўрсатиб қўярдим! — деди хамир.

* * *

Яхши эшитиш қобилияти нафақат мусиқачиларга, балки жамоатчиликнинг фикрини билиши лозим бўлган одамларга ҳам керак.

* * *

Шуҳратпараст эди… жисмоний машқлардан фақат юқорига тортилишнигина бажарарди…

* * *

Ноғоранинг асосий афзаллиги — ичи бўшлигидир.

* * *

Ишлаётганларга камроқ халал бериш — ишлаб чиқаришни ўстиришнинг катта захирасидир.

* * *

Бир кўз қисиш билан битадиган ишлар бор, аммо кимга кўз қисишни билиш керак-да…

* * *

Қўллар ва оёқлар тезроқ бойиб кетишни истаб қолишганда, бошни қимматроқ баҳода сотишга ҳаракат қилишади.

* * *

Олтиндан ясалган балиқ Олтин балиқ бўлолмайди.

* * *

Ўзинг ўтирган шохни кесишнинг нима кераги бор? Пишавер — ўзлари қоқиб туширишади.

* * *

Бутун ҳаётида қийшиқ ойнага қараб келган одам тўғри ойнадан ўзини таний оладими?

* * *

Одам ҳамма нарсага қодир! Фақат одам бўлиш қийин.

* * *

Миқдор сифатга айланади, аммо юқоридан берилган кўрсатма бўйича…

* * *

Қандай бой тил!… У билан ҳар қандай миқдордаги пулни ифодалаш мумкин.

* * *

Агар қўллар қисқа бўлса, унда муваффақият оёқларнинг узунлигига боғлиқ бўлади.

* * *

Кенг халқ истеъмоли моллари фабрикаси пародия жанрида фаолият кўрсатарди…

* * *

Учар ликопчани чўчитиб юбормаслик учун унга қошиқ кўтариб югуриб бормаслик керак…

* * *

Қора кунга деб ўғирланган нарса ўша кунни яқинлаштиради.

* * *

Модданинг оғирлиги ўлчанаёган жойга эмас, ким ўлчаётганига боғлиқ.

* * *

Айрим одамлар қаерга йиқилиши мумкинлигини билишади ва оромкурси ҳозирлаб қўяди.

* * *

Эшакнинг фахрланиш учун асоси бор — уни тез-тез одам билан тенглаштириб туришади.

* * *

Кўз, қош, бурун ҳам миллий ўзига хосликларга… оғиз эса байналмилал характерга эга.

* * *

Бўри ҳам қўйларни яхши кўради, аммо ўзига хос тарзда…

* * *

Ёзганлари шунчалар хом эдики, ғижимлаб ўчоққа солганда ҳам ёнмади.

* * *

Одамларни бир-биридан масофа эмас, фикрлар узоқлаштиради.

Русчадан Ҳабиб Сиддиқ таржимаси.

“Жаҳон адабиёти” журнали, 2005 йил, 12-сон


Зиё истаган қалблар Telegram каналига марҳамат!